কি দিন আসিল ভাই,
জ্ঞাতি গুষ্টি সগায় থাকিয়াও
বগলোত কাহোয় নাই।
সগারে মনত ভয়!
মোর গোরত ঘেষ্টিলে যুদি
ওমার কিছু হয়।
বাইরা নাখারি ঘর
কয়দিন থাকি এট্টে থাকোং
বদ্ধ তার দুয়োর।
জ্বর আর শুক্যান কাঁশ
ঐবাদে মোক একেলা থুয়া
দিছে হাজত বাস!
জিউটা কাউলি মরে
আও কাড়িবার মানসি নাপাং
থাকোং ধরফরে।
হাতাসে শুকায় বুক
হৃদপিণ্ডটা থাকি থাকি
কত্তিছে ধুকপুক।
বাবা বাবা কয়া
ব্যাটা দুখুনা ডুকুরি কান্দে
বগলোত না পায়া।
আইস্প্যার নাদেয় কাও
মুখ ফিরিয়া দুই চখুর জল
মুছে ব্যাটার মাও।
নিক্যাশ ফ্যালে যায়
কত্পা কথা মনত ঘোরে
খুলিয়া কবার চায়।
হিয়াত নাগিছে গিঁটো
মরার করোনা আসিয়া দ্যাশোত
হামাক কইচ্ছে খাঁটো।
আশ-পরশির মুখ
মোর নামের কুৎসা কয়া
পায় যে ক্যামন সুখ?
ভাবিয়া না পাং থাও
হাকাউ হাকাউ ডোং তুলিছে
অজগুবিতে ফাও।
ঢাকা থাকি আসি
বাপের ভিটাত নিজের বাড়িত
হনুং পরবাসী।
কি কইম দুঃখ আর
চোর ছ্যাচরাও পায় নাই বোধায়
এইদ্যন ব্যাবহার।
বন্ধ করিল ঘাটা
বাড়ি আসিয়া হনু বুঝি
সগারে চোখের কাঁটা।
নিজোকে নাগে ঘিন
ক্যাঙ্করিয়া কাটাইম ঘরত
একটানা চৌদ্দ দিন?