হামরা হইলোং কলুর বলদ; ঘানি টানায় কাজ,
হামার কিসের বাঁচনমরণ কিসের শরম-লাজ।
আকোয়ালের ডান্ডা কোনা তুলুক যতই ছাল,
দিনাও খাটে আইতোত খিলায় তাতেও হামার ভাল!
মুখ ফুটিয়া না কই কোন সহ্য সীমা খুব,
ডাঙ্গাইলে বা কাটিলে কি হামরা থাকি চুপ!
দোশিয়া বা একশিয়া মই জোঙ্গাল ঘারত নিছি,
মুটিয়া ধরি আকোয়াল হামাক ডাঙ্গাউক কষি কষি।
টোপাঁ-গোঁমাই মুখোত পেন্দা আর না হৈলে ছোঁটা
এপাক-ওপাক হবার গেইলে টানিয়া দিবে খোঁটা।
খাবার জোটে ষোলহাতি দড়িত বান্ধা খুটোত,
শক্তি যতই থাকুক হামার আছি ওমার মুঠোত।
দিন-রাত্তি খাঁটি মরি,আকোয়াল গোণে পাইশা,
শিঁকি খিলায় আদলী টানে হিসেব বারোমাইসা।
পাইশা থাকি ট্যাকা গোণে ডলারে ডলার ভারী,
হামার রক্তপানি করি বানায় বাড়ি-গাড়ি।
প্যাটের ভোকোত হামলে মইলেও নাড়িটা দমদমা,
চাড়িয়াত ফেলা বাসিয়া পচা হামার বাদে জমা।
খাটাখাটুনির পাইশাত হৈবে দরের কষাকষি,
গিরী গিলিয়া কোরমা পোলাও হামাক দিবে ভূষি।
স্বাধীনতা নাইতো হামার খোঁয়াড়োত থুইবে সোন্দে,
অজাইত-কুজাইত সগায় মিলি থাকেক বাসে-গোন্দে!
যতই হামরা হৈনা ক্যানে মিঠা দুধের গাই,
খাইবে হামার পিন্দবে হামা হামারে শান্তি নাই।
রচনাকালঃ০১/০৬/২০২০খ্রিষ্টাব্দ।